គ្មានតែអាចបង្កើតឲ្យមាន
ល្បិច “គ្មានតែអាចបង្កើតឲ្យមាន” និយាយងាយស្ដាប់ គឺគ្មានខ្យល់តែមានរលក គ្មានរឿងអាចបង្កើតឲ្យមានរឿង។ គោលគំនិត គឺខ្លាចតែសង្គមមិនច្របូកច្របល់ គោលបំណងនៅត្រង់ឆ្លៀតឱកាសបន្លំចាប់ត្រី ស្នាដៃគឺបង្កើតបញ្ហា។
ប្រតិដ្ឋរឿង មើលពីខាងក្រៅថាជាការងាយ តែចង់សម្រេចគោលបំណងរបស់ខ្លួនដោយប្រតិដ្ឋរឿង ពិតជាលំបាកណាស់។ ការប្រតិដ្ឋរឿង តាមក្រឡុកក្រលៀតកៀនកោះ បើបានសម្រេច អាចសប្បាយបានមួយពេលដែរ តែលទ្ធផលនៃការប្រតិដ្ឋរឿងបែបនេះ គ្រាន់តែអាចធ្វើឲ្យគូរសត្រូវ រងគ្រោះរបស់ខ្លះៗប៉ុណ្ណោះ។ ហើយមិនប្រាកដថា មានផលប្រយោជន៍ចំពោះខ្លួននោះទេ។ ការប្រតិដ្ឋរឿងដែលមានគោលបំណងច្បាស់លាស់ តែគ្មានផលប្រយោជន៍ចំពោះខ្លួន គឺមិនអាចរាប់ថាជាល្បិចនោះទេ។
សុភាសិតមួយបានពោលថា៖ រឿងប្រតិដ្ឋត្រូវបានបញ្ចប់ត្រឹមអ្នកចេះដឹង បានន័យថា រឿងប្រតិដ្ឋ ដែលគ្មានផែនការរៀបចំឲ្យបានល្អិតល្អន់ និងប្រកបដោយការប្រែប្រួលទេនោះ ពិតជាគេចមិនផុតពីក្រសែភ្នែករបស់អ្នកចេះដឹងបានទេ។ ដូច្នេះគួរនិយាយថា រឿងប្រតិដ្ឋ គឺបង្កើតដោយស្នាដៃរបស់អ្នកចេះទើបមានភាពត្រឹមត្រូវជាង។ បង្កើតបញ្ហា មានន័យថាផ្អែកទៅលើរឿងអ្វីមួយដែលមានស្រាប់ ហើយពង្រីកការខុសនិងត្រូវ ឲ្យកាន់តែធំធេងឡើង តែអ្វីដែលចង់និយាយនៅក្នុងល្បិចកលនេះ គឺមិនចាំបាច់ផ្អែកលើបញ្ហាដែលមានពិត ឬយោងតាមមូលដ្ឋានអ្វីទាំងអស់ តែអាចបង្កើតបញ្ហាបាន។
រឿងប្រតិដ្ឋ ការពិតគឺគួរឲ្យភ័យខ្លាចជាងអ្វីទាំងអស់ វាគ្មានរូបតែអាចមើលឃើញ វាគ្មានស្រមោលតែអាចជួបប្រទះ ខុសឬត្រូវចេញពីមាត់ សំអាងលើសំដីតែប៉ុន្មានម៉ាត់ប៉ុណ្ណោះ អាចឲ្យមនុស្សមើលស្រាលជីវិតបាន អ្នកក្លាហានអាចដោះអាវក្រោះបាន។
ក្នុងក្បួនយុទ្ធសាស្ត្របាននិយាយថា៖ វាយសត្រូវដោយប្រើរឿងប្រតិដ្ឋយ៉ាងប៉ិនប្រសប់ មិនបាចឆ្លងកាត់ការប្រយុទ្ធ ក៏អាចឲ្យសត្រូវទម្លាក់អាវុធបានដែរ។ បើនិយាយថា ការបង្កើតបញ្ហា គឺធ្វើឲ្យសង្គមច្របូកច្របល់នោះ មានន័យថា ពាក្យប្រតិដ្ឋ គឺជាប្រភពនៃការបង្កើតបញ្ហាតែម្ដង។
ជាទូទៅ នៅក្នុងការបង្កើតរឿងប្រតិដ្ឋ ត្រូវចេះពិនិត្យមើលកាលៈទេសៈ ត្រូវប្រតិដ្ឋឲ្យសមហេតុសមផល និងរហ័សទៀតផង គឺមិនត្រូវប្រើពេលវែងអន្លាយនោះទេ ដែលនិយាយថា ជឿឬមិនជឿអាចសាកល្បងចំពោះមុខ ស័ក្កិសិទ្ធិ ឬមិនស័ក្កិសិទ្ធិ ថ្ងៃក្រោយទើបដឹង។ ចំណែកពេលខ្លះ ល្បិចនេះ គេបង្កើតឡើងដើម្បីទទួលបានរឿងពិតក៏ថាបាន។
ដកស្រង់ពីសៀវភៅ៖ ល្បិចទល់មេឃ
អត្ថបទទាក់ទង